新手初排分享 19/12-23/12

山風丹妮

各位師兄好 一開始先請大家原諒我文筆唔係幾好 同埋只係第二次打分享文（第一次係係隔離區分享STOP LIGHT）
所以可能會199999
同埋希望大家原諒係日本快活左幾日後一翻香港又忙到PK
所以而家先有時間分享

先講自己小小背景先
小弟只係一個讀緊書兼有份Part time仔翻下工既學生哥
兩三個月前無意到比個仆＿Frd同我介紹銀器（渡我入坑正仆＿）
之後我就極到迷戀銀器 仲日日上網睇Goro's配搭 網上唔同人既分享等等
雖然D野好靚 但我知道而家市面有好多假野 所以好快就有個心態一係去本店自排 一係就唔好玩Goro‘s
而咁岩一早Plan左今個月18-23同女朋友去東京 決定一於試試自己同Goro's有無緣份 因為自己無識任何朋友有排隊經驗
係咩都唔知既情況（淨係知Goro‘s D野好靚）膽粗粗做左一個星期資料搜集就去排隊

18/12
因為我之前上網爬文 見到唔少人話星期日係最最最最多人排隊既日子
鑑於果日我朝早7點到日本 其實攰到PK 又唔想辛苦女朋友陪我癲
所以呢日我無排到隊 而係去左惠比壽拜訪高山隆爺爺既Stop Light

19/12
晨咁早就起左身 因為想去排隊之前走一轉築地食下野先
就係咁我去完築地後就10:15左右就趕到翻原宿 係明治神宮前個站落左再行落下
行到去一條馬路前 我已經見到自己一路以黎係網上見到大名鼎鼎既'排隊專用欄杆'
我急不及待咁過左馬路 之後望望側邊D人既心口
。。。。。
我知道自己無黎錯地方 大家既心口要鷹有鷹 要毛有毛 唔洗出聲問我都知佢地係排緊Goro's
但之後另一個謎團就黎 我係到諗 究竟邊到先係隊尾
因為大家並唔係貼住咁坐哂係欄杆 有D位又比D外國遊客坐左
於是我就一於無理 繼續向前行 直至見到Goro‘s本店
見到本店後 我發現佢前面既欄杆唔係坐滿哂人
所以我就決定上前問個日本人
Is here lining up for Goro‘s?
眼前既日本人 雖然唔知明唔明哂我問乜
但可能佢聽到Goro‘s呢個字
之後佢就示意係排緊 同讓開少少比我同女朋友坐低
於是我就係係唔知自己係咪打左尖既情況下緊張地等待下一步


到10:55左右
開始有工作人員叫我地坐貼D 之後我即刻用日文同佢講我唔識日文（我只係識幾句日文 包括一句係話自己唔識日文）
因為之前上網見到有D人話佢地好易趕走人 又有D人話佢地會問好多問題
所以我想一早話比佢地知我唔識日文先
之後果個工作人員就問我英文O唔Ok
我就話OK

緊接落黎我就見到有個老老地戴住眼鏡既女人（唔知係咪高橋吾郎個妹妹？講錯勿插 新手唔識野）同一個戴住副超既後生女（上網睇話佢會問好多問題）同果堆人做Briefing
之後佢地就逐個逐個Check Passport同問幾多個人


我答完2之後佢就比左呢張野我
之後等佢派Check哂全部人就繼續等

到11:15左右 個樓梯前既閘拉開
有個好高大 個樣好似混血既女人出黎（高橋吾郎個女 呢個應該無錯啦掛）
佢拎住部iPad企係閘門口 而工作人員亦開始叫人四個四個咁由欄杆行去店前
由於我地坐好前 所以好快就到我地
到前面個人抽緊時 我地前面個工作人員就收左我地果張寫住2既飛仔
同叫我地準備Passport
呢個時候 我已經緊張到就黎瀨屎
你可能會覺得好誇張
但我果刻既心情係難以形容
由成日上網睇睇睇到真係親身到現場第一次自排
個感覺好神奇

之後終於到我地
Goro個女望一望我地個Passport
就示意我地抽籤
因為自己由到大都無咩抽獎運
我決定將呢個第一次比左女朋友
由佢去督個Mon
佢一督
。。。

168/253

隨即聽到Goro個女話Sorry。。
雖然抽唔中 但我完全無任何失落感
只係仲開心緊終於體驗到自排
我地亦繼續自己一早Plan好左既行程

20/12
呢日我無安排任何行程係早上
於是我地一起身就去排隊
經過前一日既經驗 我上網做左少少Research
發現原來抽籤前排隊位置都係有攻略
難怪無人話我打尖
大部分人都話排中間比較好 因為前面一D人會食左大Number
雖然係咁 但由於唔想辛苦女朋友陪我癲 懷住早D去抽唔中就繼續行程既心態
我又再次坐係大慨第12/13左右既位置排隊等抽籤
之後同尋日一樣慢慢等



劇情一跳就係到我地抽籤了
今次我決定自己督
。。。。

49/2XX（太緊張無睇）

我見到49之後其實無咩大反應（除左呢個咁岩就係我生日日期外）
因為我之前爬文見有人30都上唔到 所以果刻都無中獎既感覺
Goro個女見到49後 同隔離個老老地既女人傾左傾
之後就用英文問我野
佢問我英文Well唔well
果刻我Feel到好似真係中左獎 因為佢唔係尋日咁對住我講Sorry。。
我果下即刻答Well ah!!!
之後佢問我係咪第一次
我就話係
佢就再話可能會無左成日 要等好耐
問我介唔介意
我就話唔介意
雖然係短短幾句問答 但我好小心咁答
因為好驚講錯咩就無得綁手帶
問完哂後 隔離工作人員隨即幫我地綁上手帶
之後我地就出番去



之後我地就係到諗而家應該去邊
因為D人仲排緊隊抽緊籤
於是我地就番番去隊尾排
排排下覺得唔對路 呢堆人係真係排緊去前抽籤
咁中籤果D呢。。。

於是向後行多陣
頂 原來有工作人員安排緊中籤既人跟番次序排番好
我地就去個工作人員到示意一下手帶
佢就安排我地個位置

（出賣一下女朋友 呢到開始中籤既人排番一條隊）

我地慢慢等 等到12點幾1點終於抽哂籤
我以為自己49應該係最後
但最後後面都有好多人 應該有成60組

之後Goro個女同果個老老地戴眼鏡女人就黎逐個登記同係手帶上加左D防偽既野
登記哂好 果個老D既女人就黎到我果堆人面前 話比我地同幾個日本人知因為我地呢組人係比較後
叫我地3點鐘先番番黎呢個位或者前D繼續排（我當時既位置係搭Lift落車站果個位後面）

當初排既時候其實已經同女朋友講應該要食飯盒果D 知道佢有少少唔開心但又肯陪我癲
而家突然好似多左2個鐘咁 我地即刻好開心同決定去食個一蘭加行下原宿（我第一次黎東京咋）



到2:50左右
我同女朋友買左D飲品就番番去欄杆到坐
由於日本冬天太陽好早落山 所以愈坐愈凍
亦感覺到女朋友心情愈黎愈差（其實真係辛苦哂佢陪我癲）
坐坐下 坐前面果位46號哥仔發現我係香港人
於是用普通話撩我講野
佢係中國人 但係日本留學
經常幫人訂Stop Light 但都有賣Goro‘s
簡單D講係買手之類啦 名我就唔開啦 但好似做到好出名咁
仲加左我Wechat
我同佢傾下傾下 佢亦話左一D我唔太清楚既野我聽
例如話上面有個鬍鬚佬叫Kan San（唔知岩唔岩 我之前好似都上網聽過下佢又係係Goro's做左好耐）
一般上唔到去既人係唔會見到佢
又同我講話上到去會發現其實間舖好細之類。。

坐左陣之後我發現我地前面係三人一組既日本人
其中一個頸上有中金頭鷹＋大金頭鷹 手上亦有點金金鷹爪鈪
而佢個仔仔 係同緊工作人員玩 所以一睇就知來頭唔小
之前爬文時話有D人會突登抽籤上去傾下計 睇黎前面果三個就係（我諗佢咩都齊無野要買）

到左4點3左右時 隔離果個中國人話我知數到下波就到我地同前面果三個日本人（一波上6個）
於是我又再次緊張
之後等。。
。。

4點45
點解仲未落黎架。。 買咩買咁耐

5點鐘
隔離個中國人話佢唔記得左小休係幾時開始
但我地再上唔到去可能又要等多一個鐘。。
呢個時候我心諗唔好掛 好＿凍 （我女朋友已經凍到無左反應）

山風丹妮

到5點20左右
上面既人終於落哂黎（心諗佢地買咩買咁耐？可能換扣？可能傾計？）
Goro個女亦落左黎 示意我地上去
我同女朋友企左起身 行左入去開始上樓梯
樓梯級果然如網上文章一樣 因為歷史猶久既關係 有D難行
入到門口後 果三個日本人已經同緊果個老老地既女人傾計 我就繼續周圍望下望下
而我前面個中國人 就比Goro個女示意佢去睇牆上面既紙
之後我又好奇望下咩黎 但我睇唔明 Goro個女亦叫我唔洗理 繼續自己睇野（後尾個中國人Wechat我話佢被請走了 應該係知道佢係買手果D）

我望一望個櫥窗 入面有好多個無掛野既勾勾 我知道所有羽毛都已經落哂架。。
呢個時候我決定上前問Kan San（其實我唔知佢係咪真係呢個名架 求各位師兄指點 掌控住櫃枱果個大鬍子呢）
我話可唔可以要戒指
佢話Sure 問我想戴邊隻手指
我話左中指
之後佢叫我放隻手掌上枱面
望一望後就係櫃到拎左隻平打點金戒比我試
我試完之後話有D緊
之後佢就再係櫃到拎另一隻比我 叫我Try
呢隻就超級Fit
之後我問佢可唔可以要多隻For女朋友
佢又話OK
之後佢又重覆以上動作 試到我女朋友話Size OK為止
試完戒指後 我就轉身望番個櫥窗 問女朋友意見邊個靚
之後我就主動指住個小箭頭同Goro's個女講 想要呢個
佢話OK
之後我就再指住個鷹匙話可唔可以要埋呢個比我女朋友戴
佢亦話OK

之後我主動同Goro's個女講野
話自己係係香港黎 好鍾意Goro's 同埋自己只係學生哥 唔係成日有機會黎日本 上到黎好開心
佢就笑笑口話Thank you 之後問我讀緊咩
我話Fashion design 之後佢話Interesting
又問我女朋友讀咩。。

傾左陣後
之後我就上前問問Kan San話想要Bracelet（平打鈪）
今次終於無得Say yes 佢話Today sold out
於是我問佢咁有無Leather bracelet（皮手環）
Goro個女就即刻問我係咪Sure 話會好痛
我話係 仲問佢可唔可以幫我戴
佢就話Of cause
之後佢叫我伸出隻手比佢揸揸手腕睇下戴咩Size
然後入左去後面拎
拎完出黎後就比左我 教我點戴 叫我試下
我就開始戴
戴既途中 佢笑笑口同我女朋友開玩笑 話我唔洗生BB 所以要經歷下女人生仔既痛
仲話呢個係勇氣既證明

相反地隔離既我就笑唔出 因為我戴極都戴唔入
最後果個老老地既女人叫我放隻手上枱 好似拗手瓜咁既姿勢
個人半跪咁 佢幫我戴
途中Goro個女亦教我一D技巧 話過左果個位手指公就向外用力
之後就易入好多
終於幾經辛苦＋比幾個日本人望住＋比老老地個女人刮算左手既情況下
我戴好左人生第一條皮手環
之後Goro個女就同我講我係XS size
之後又考我問番一次我係咩Size
我話XS
佢話Good 叫我下次黎到再想買就識話要咩Size

佢之後就問我女朋友想唔想戴條
我女朋友即刻話唔要唔要咁（佢睇住我戴既過程已經嚇到PK）
我一路幫隻手止血 一路望住D財布
望左陣Goro個女主動問我想要邊個 我話想要Wallet
之後佢就同我介紹邊D係卡套 邊D係散紙包 邊D係銀包
最後我揀左個短財
佢問我想要邊隻色 我話要原色
之後佢又入左去拎比我

拎左出黎後 佢仲慢慢話比我知邊D位係擺咩
又話散紙包位條皮繩翹一下就好 翹多就會整鬆個銀幣扣
又話我知有暗格等等
我就回佢一句Good design咁

最後Kan San就督計數機埋單
我亦襯女朋友幫手數錢比佢既時候再同Goro個女表示自己其實最想買到羽毛
可惜抽到太後
之後我同佢講黎緊星期四五都會黎
佢就笑笑口講笑話會幫我抽個靚Number

就係咁我埋完單後 就問佢可唔可以而家戴哂D上身
佢就話緊係得 仲帶我地去鏡前面照下 叫我地用調節珠調好個長度 比意見我地
之後我地就開開心心拎住戰利品離開


21/12
定休

22/12
98/218

23/12
147/301（呢日係日本天皇誕 所以多左人）

總結：
第一次算係唔錯收獲 排完第一次後而家已經好想又飛過去排（D人話會上癮原來係真）
希望下次可以買到羽毛／銀鏈／平打手鈪 同想幫個短財換扣。

（真係損左架個虎口位）

BlessingU

49都有4件銀器算好好啦下次再努力

yuenhuihui

你個朋友渡你玩 就令你破費

sumsumsum

靚AJ

yuendenden

巧有心的分享！完全巧似同ching你一齊經歷！下次一定買到毛毛的！今時今日上到本店又可以買嘢已經係十分難得了！

madpager0913

今時今日 成2XX組, 上到去已經當嬴~~ 再次恭喜入坑成功

十四毛

第一次就買到平打戒係本店俾你既一個好好鼓勵，繼續努力。

auto310

SL加Goro's之旅，中銀毒病既開始！

不過係好既開始。

St_Paul

上一次買到咁多野已經好正 恭喜師兄入坑

tfko

很詳細，多謝分享

him952

情侶戒指正！好好既入手報告，多謝分享

issabb

難得女友貢凍陪你一齊排，入到情侶介一定好開心，恭喜，恭喜，下次繼續努力ar

kl8723

今時今日抽到上到又入到對平打介簡直萬幸呀！多謝你詳細嘅本店遊報告，不枉我應承你幫你攞SL！讚！