|
|
完全係臨時決定嘅本店之旅， 本身完全冇計劃會冬休出發， 因為太多人同埋太凍，而且夏休嗰轉未回氣， 但係俾我唔小心喺facebook 見到有人喺冬休排出我最想要十字架， 我個心即時熾熱起黎喇； 而且唔知好彩定唔好彩， 嗰排冇工開， 成碼有成個禮拜休息，喺老婆不情不願嘅情況下， 我買左機票，獨自上路.
12/1 星期四
成日出發前滿腔熱忱，實際去到表參道都會覺得心身疲倦，其實過晒冬休都唔預會有十字架； 但係第一日真係好想有手帶， 因為酒店成三點先可以check in, 冇隊排唔知去邊好； 好彩地， 是日抽到55。3點歸隊， 約5:30上本店， 第一樣想幫個boxing 加返條繩等個袋可以斜揹， 但kan 話已經太晏， 要早啲先可以做》》即係「失敗」， 第二樣想要個硬皮袋， 問有冇黑色》》「成功」，仲可以揀埋concho， 第三樣問可否訂皮帶》》當然係「失敗」啦，第四樣問中金心》》「成功」，最後問短財》》「成功」揀埋concho； 第一日嘅豐收， 覺得總算不虛此行， 因為之前都好驚會六日全炒。
13/1 星期五
今日我老婆都飛左過黎一齊抽籤（可能佢好擔心我一個人悶， 寧願請兩日病假都要黎陪我排隊）， 但係我都好開心佢黎， 因為佢啲抽籤運一向都強過我； 登登登登， 真係好強， 是日第7，
第一次抽到個位數，當堂呆左； 雖然係第二輪上， 但都要等到約兩點先上， 喺樓下好多幻想， 心諗有冇十字架呢， 老婆問除左十字架有冇咩想要， 我話想要金繩藍， 不過好似好耐冇出過， 好難遇到， 大家仲講話上面啲燈光好難分金同銀， 靠睇價錢先知咩係金繩銀繩；上到去，個毛櫃係同我尋日差不多，喺加大毛齊啲， 介指櫃都冇特別，嗰剎那係灰灰地， 但原來好事都發生左， 我老婆同我講， 毛櫃有金繩藍， 我本身都唔信， 以為佢睇錯上金藍， 佢同我講六萬幾円係金繩藍喎， 即時一遍光明， 今鋪都冇浪費靚籤；第一樣我照問個boxing 加繩，心諗今次一定得啦，點知係》》「失敗」，理由係我用得唔夠耐，要我用耐啲先幫我加繩，第二樣我問皮帶》》「成功」， 我差啲開心到叫出黎， 二女帶左去後面度size，搞左一輪返返櫃面， 我老婆同我講今日Kan San 只係俾揀一銀器， 佢揀左個中太陽之後已經唔俾佢再揀野，我嗰吓見Kan San 好似想計數， 我即刻問可否俾我要條金繩藍，好彩》》「成功」，最後買埋個龍角散就走。
14/1 星期六
錢已經用晒，而且我老婆凍到病左， 所以抽籤嘅心情相對冇咁緊張；好彩地今日抽到43， 好凍嘅情況之下冇得三點返， 要繼續排， 到五點先有得上；是日主要想幫個中鹿加個春袋仔同埋加雪羔筒， 所以第一樣就問》》成功， 冇咩特別野嘅情況下， 我兩個入左點金加大毛左右向就bye bye喇。
15/1 星期日 抽92冇手帶
16/1 星期一 抽114冇手帶
17/1 星期二
我老婆已經早一晚返香港， 我又單拖， 咁啱版主今日到埗一齊抽， 咁大家就可以傾兩句，冇咁悶， 今日係最後一日， 我又夜機走， 所以如果排唔到我又冇地方去， 都好頭痕； 好彩抽到77， 知道真係可以排足一日喇， 事實真係排到7:15分先上到去，太陽落山之後真係好凍；小休途中有段小插曲， 有三條友自己拉閘上左， 搞左廿分鐘都未落離， 心諗如果係明星都唔知要搞幾耐， 等到6:45嗰三個人落黎喇， 原來係藤原浩；上到去， 乜都冇咁滯， 想幫個硬皮袋加雪羔筒》》失敗， 淨係加多個春袋仔， 最後幫第三日買嗰條點金配左條細丸就bye bye 喇。
|
本帖子中包含更多資源
您需要 登錄 才可以下載或查看，沒有帳號？立即註冊
x
|
發表於 2017-2-1 20:42:25
發表於 2017-2-1 20:47:40
